الطحانة

 
هاذم يقولو عالاخرين طحانة.
والاخرين يقولو على هاذم طحانة.
والطحين درجات ومراتب كرمك الله.

والطحين معناها تحويل الكلام المكعبر والمدڨدڨ إلى دقيق رطب سهل البلع. وهي عملية غاية في التبلعيط.
عندك طحان بڨرونو. هذاك في التوپ.
وعندك طحان بكوارطو. زادة حتى هو يعبر.
وعندك طحان مترسم. هذاك تابع جهة معينة.
وطحان تحت الطلب. للي يدفع اكثر.
وطحان يهاجم في الطحانة، وهذا أكثرهم دبلوماسية ومكر.
وطحان متخفي ومقنع.
وطحان دغفة ما مصور شيء من طحينو.
وفمة الطحان الي خايف مالطحانة الي زيو لا يطيحو عليه السوم.
وفم طحان متدين وفي ايدو سبحة وفم الي عامل لحية ولابس دشداشة.
وفم طحان مثقف. وطحان يساري. وطحان يميني.

وفم طحان مأجور. وطحان يستنى في الأجرة.
وفم طحان هاوي. ومتربص. ومتخرج. وبطال الخ الخ..

الطحانة في بلادي على كل لون يا كريمة.
واللي ما يطحنش حتى وإن عاش عمره الكل ساكت فسيجد نفسه في وسط طاحونه متع طحين.

في النهاية الواحد كيف ما يلقى لمن يطحن تلقاه يطحن لروحو. على خاطر الأنا عنده متظخم وما تعجبه كان روحه. وهذا زايد الحديث معاه.
لذلك تهمة الطحين؛ يا ساده يا ماده؛ في غالب الأحيان وباختصار لا يستعملها إلا الطحانة باش يبعدو على ارواحهم شبهة الطحين.

أرجو أني قد شرحت ووفيت الشرح. وبلغت وأوفيت التبليغ في مفهوم الطحين. ولكم سديد النظر.
نصيحة لوجه الله ماعاد تتهم حد بالطحين على خاطر الناس الكل عارفاته وفاهماته وطاحناته وما باش يصدقك حد. وإلى اللقاء في طلعة جديدة من طلعات الطحانة العصرية. نوفو موديل.. ههههههه.       

(نجيب بتصرف شديد وغريب جدا)