رسالة من ليلى طوبال إلى عصام الشابي

 

        من مريضة "نفساوية" الى عصام الشابي: 
إي انا مريضة، عندي Trauma ـ حاشا قدرك ـ ونشرب في الحرابش باش نرقد من نهار اغتيال حبيبي شكري وبعدو اغتيال الحاج البراهمي وبعدو كمين سقراط، مريضة وطلعت للشعانبي كي تذبحوا جنودنا في شقان الفطر، مريضة والبيسين الغارقة في الدم والجثث العايمة فوق الماء في سوسة والكار الي اطرشقت بحزام ناسف في محمد الخامس وضحايا عملية باردو وراس مبروك السلطاني الي بعثوه لأمي زعرة في ساشي ما زالو قدام عينيا، مريضة ببلادي وعلى بلادي الّي فلست، بركت، خيابت، حزنت، كحالت، تذبحت، تنحرت وانتوما لا بلّيتوا ولا علّيتوا. آش عملتوا 11 سنة قول للمريضة يا سياسي يا خشين آش عملتوا وتوه فاش قاعدين تعملوا؟؟؟ انا مريضة ونزيد نكبش ألف مرّة في مسار 25 جويلية وفي قيس سعيد، ونحبّ يكبر بيا المرض كي نشوف ذلّكم لسيدكم ونسمع كلامكم المهرّي والسخيف والتافه. أنا مريضة ولا رجوع الى الوراء وما نحبّش نبرى قبل ما تظهر حقيقة الي صار الكل في البلاد 11 سنة، مريضة وما نحبّش نبرى قبل ما نشوف تونس فرحانة، تجري والريح يشطح مع شعرها وضحكتها تشق بيبان السماء. تمشيش عاد بعد ما تقرا التدوينة تقول هاذي موش مريضة، هاذي مهبولة بكوارطها، وترميوني ـ إنتوما يا سياسيين الغلبة وسيدكم ـ في المُرسطان ... ؟؟؟ 
                            (ليلى طوبال)