الأمطار! أما الطبيعة لها أحكامها

 

وقت دولة فيها 1400 كلمتر شواطئ  وتمتنع على إنشاء محطات لتحلية مياه البحر ووقت دولة الي يحك راسو فيها يعمل معمل متاع ماء ويستنزف المايدة المائية مثلا المايدة المائية في القيروان وسيدي بوزيد  يجبدوا منها: صابرين وجنات وحياة ودليس.. ومعاهم عشرات الآلاف من الآبار غير مرخصة.
نزيدوهم دولة لا تتصرف في مياه الأمطار التي تنزل في المدن والتي تاخذ مجراها المدمر دائما في اتجاه البحر والتي يمكن تجميعها واستغلالها.
وقت دولة هكة تعمل دعوة رسمية عن طريق وزارة الشؤون الدينية في بلاغ رسمي لصلاة استسقاء ماتنجم تكون كان دولة مقصرة في حق شعبها بالمشاريع والتنمية والتخطيط وترمي في فشلها على المطر والطبيعة والتغيرات المناخية.
صلاة الاستسقاء تقليد ضارب في القدم وفمة عكسها بالضبط في اليابان وبرشة دول يعملوا صلاة من أجل تجفيف الأمطار لأنها تصب بأكثر من 10.000 ملمتر في السنة.. يعني هو تقليد يخص أفراد موش سياسة دولة.
نشيخ وقت صغار الحومة يعملوا قايمة شهلولة ويروحوا ببرشة بسيسة وبسكو وحلوى وضحك وفرحة.. أما إجرام وقت دولة تعمل قايمة شهلولة.
نشيخ وقت نرى عمي وخالي وجيراننا يذبحوا كبش والا عجل ويصلوا باش يطلبوا المطر ونشيخوا دوار كامل باللحم والضحك والجو.. أما نخاف وقت تولي سياسة دولة يصفقلها الدهماء والعامة وينساقون بالتهليل.
الطبيعة لها أحكامها وربي خلقلنا العقل باش نبنوا السدود والبحيرات ومحطات تحلية مياه البحر ونتصرفوا في مياه الأمطار ونعملوا منظومة مائية باهية ونوصلوا الماء للاراضي الفلاحية في قفصة والقصرين والقيروان وبوزيد وقابس وسليانة ونوقفوا مد الصحراء بحزام متاع غابة نزرعوها ونردوا بلادنا جنة بالخدمة والجهد والعرق والعلم موش باستبلاه الناس والشعب.
ربي يهدي واكاهو.. وتوة نهار تتوفر ظروف مناخية لهطول المطر أو البرد أو الثلج توة ينزل.. البقية شعوذة وضحك على الذقون واستمتاع ركيك ببساطة وصدق الناس وطيبتهم وتدينهم..   (منقول)